Deputeti i Partisë Socialiste, Musa Ulqini ka komentuar situatën politike në vend, pas vendimit ekstrem të opozitës për të djegur mandatet.
I ftuar në rubrikën e “Opinion”, në News 24, Ulqini tha se argumenti i vjedhjes së votave që del dy vite pas zgjedhjeve është thjesht alibi në kufijtë e qesharakes, ndërsa akuzon opozitarët se me vendimin e tyre nuk po dëmtojnë vetëm shqiptarët, por të ardhmen evropiane.
“Është e vështirë të japësh përgjigje fundore, pasi një gjë e tillë ndodh për herë të parë, plus që ende nuk ka marrë formë. Asnjë çështje nuk argumenton vendimin e marrë nga lidershipi i opozitës. Mandatet nuk t’i jep Kongresi dhe Këshilli i partisë. Ditën që ti betohesh në Parlament, nuk e bën para kryetarit por para qytetarëve që na kanë votuar dhe përpara Kushtetutës. Nuk ke të drejtë të vendosësh për diçka që është përtej tagrit tënd. Megjithatë edhe nëse ndodh, Parlamenti do vijojë të jetë legjitim sa kohë mazhoranca është në përputhje me Kushtetutën dhe Kodin Zgjedhor. Në demokraci shumicat qeverisin. Ne kemi 74 mandate. Kjo nuk e cenon legjitimitetin e Parlamentit. Me këtë veprim ata nuk djegin thjesht mandatet, por të ardhmen e shqiptarëve në BE”,– tha deputeti.
Por pavarësisht situatës së krijuar ai tha se, qeveria nuk ka arsye ta çojë vendin në zgjedhje të parakohshme.
