Studiuesit nga Universiteti Shtetëror i Ajouas në SHBA, kanë zbuluar se pirja e verës së kuqe dhe ngrënia e djathit, mund të ndihmojnë në uljen e rënies njohëse tek të moshuarit.
Në një studim, studiuesit analizuan të dhënat e 1.787 të rriturve të moshës 46 deri 77 vjeç, dhe u kërkuan atyre që të plotësonin disa pyetësorë në lidhje me konsumimin e ushqimit dhe alkoolit.
Rezultatet treguan se djathi ishte dukshëm ushqimi më mbrojtës ndaj problemeve njohëse të lidhura me moshën, madje deri në fund të jetës.
Edhe konsumi ditor i verës së kuqe, gjithashtu e përmirësonte ndjeshëm funksionin njohës.
Ndërsa konsumi javor i mishit të qingjit, u vërejt se përmirësonte aftësinë njohëse afatgjatë. Megjithatë, ekspertët zbuluan se konsumi i tepërt i kripës rriste shumë rrezikun e problemeve njohëse.
Dr. Auriel Uillt, që drejtoi studimin tha: “Unë u befasova pozitivisht që rezultatet tona sugjerojnë se të ngrënit në sasi të mëdha të djathit, dhe të pirit të verës së kuqe çdo ditë, nuk janë vetëm të mira për të na ndihmuar të përballojmë pandeminë aktuale të Covid-19, por ndoshta edhe për t’u përballur me një botë gjithnjë e më komplekse që duket se nuk ngadalëson ndonjëherë”.
“Ndërsa ne morëm parasysh faktin që nëse kjo ishte vetëm për shkak të asaj që hanë dhe pinë njerëzit e pasur, provat klinike të rastësishme janë të nevojshme për të përcaktuar nëse disa ndryshime të lehta në dietën ushqimore mund të ndihmojë shumë trurin tonë”, shton më tej ai.
Ndërsa arsyeja e kësaj lidhje mbetet e paqartë, studiuesit besojnë se djathi dhe vera e kuqe mund të mbrojnë disa njerëz nga efektet e Alzheimerit.
Brandon Klajnesinst, një nga autorët e studimit shtoi:“Në varësi të faktorëve gjenetikë që bartin, disa individë duket se janë më të mbrojtur nga efektet e Alzheimerit, ndërsa të tjerët duket se janë në rrezik më të madh. Thënë këtë, unë besoj se zgjedhjet e duhura të ushqimit, mund ta parandalojnë tërësisht sëmundjen dhe rënien e aftësive njohëse. Ndoshta, formula magjike që po kërkojmë po e përmirëson ndjeshëm mënyrën se si ushqehemi. Të dish se çfarë përfshin kjo, kontribuon në një kuptim më të mirë të sëmundjes së Alzheimerit dhe vendosjen e kësaj të fundit në një trajektore të kundërt”- shprehet Brandon Klajnesinst.
Burimi i lajmit: https://www.mirror.co.uk/science/eating-cheese-drinking-red-wine-23164103
Përshtatur nga TIRANA TODAY
