Luftëtari tashmë ka bërë kthesën e madhe dhe ka shpresë për të siguruar qëndrimin në Superiore. Të besuarit e Hasan Likës kanë shpartalluar Partizanin e Starovës në Gjirokastër me rezultatin e thellë 5-0. Një rezultat që askush nuk e kishte menduar, në këtë pikë të sezonit ku u mendua se Partizani ishte kthyer pas atyre 10 pikëve të marra në katër ndeshjet e fundit. Një triumf i pastër taktik i Hasan Lika ndaj Starovës, bashkë me të cilin e ka shpallur për herë të fundit kampion Partizanin në vitin 1993. Partizani në pjesën e parë ishte katastrofë, ku u detyrua tre herë të nxirrte topin nga rrjeta dhe mbrojtja e kryeqytetasve ishte katastrofë. Në minutën e 21-të, falë këmbënguljes së gjatë të bluzinjve, Dejvi Bregu i gjendur në kohën dhe vendin e duhur pranë vijës fatale, nuk e ka të vështirë për ta dërguar topin në rrjetë.
Brishtësia e të kuqve në fazën mbrojtëse doli në pah edhe të 37-tën, kur Kristal Abazaj pasi shmang Ibrahimin realizon të dytin për vendasit përballë Hoxhës. Por mbrojtja e tmerrshme e Partizanit i la hapësira një prej lojtarëve më të mirë të Luftëtarit, Rrocaj i cili 2 minuta me vonë, me Hoxhën që s’mund të bënte asgjë për të shmangur të tretin. Tmerri për 15-herë kampionët e Shqipërisë do të vijonte edhe në pjesën e dytë, teksa në minutën e 61-të Eri Lamçja do të realizonte golin e katërt. Nuk do të kishte fund “makthi” për të kuqtë, pasi Lamçja shënoi edhe golin e pestë dhe të dytin personal 10 minuta para përfundimit të kohës së rregullt.
Laçi bën 3 fitore radhazi, teksa ia ka dalë të marrë 3 pikët edhe në Vlorë, në një takim të luajtur në 2 ditë. Pjesa e parë e sfidës, e luajtur dje në Vlorë, përfundoi me rezultatin 0-1 për Laçin, ndërsa u ndërpre më pas për shkak të reshjeve të shumta, për të vijuar sot. Në 45-minutëshin e dytë, skuadra e Mezanit arriti të administrojë mirë avantazhin e djeshëm, ndërsa Flamurtari u ndal në shtyllë, dhe nuk arriti të gjejë rrjetën e Selmanit. Kështu Mezani rikthehet në Vlorë dhe bën që drejtuesit e Flamurtarit të pendohen që nuk i besuan, ndërsa Laçi ngjitet në vendin e tretë të renditjes, me 24 pikë.
