30 gushti shënon Ditën Ndërkombëtare të të Zhdukurve në Kosovë, njerëzve që u internuan dhe që kërkohen edhe sot e kësaj ditë nga familjarët e tyre.
Kjo ditë ka “bërë bashkë” politikat kosovarë, të cilët e kanë përkujtuar në mënyra të ndryshme, duke dhënë mesazhin që të gjithë duhet të angazhohen për zgjidhjen sa më parë të kësaj çështjeje.
Presidenti Thaçi ka thënë se të gjithë duhet të angazhohen që kjo çështje të zbardhet sa më shpejt:
“Dita Ndërkombëtare e të Pagjeturve na kujton edhe një herë dhimbjen që ndiejnë familjarët, por edhe e tërë shoqëria, nga kjo plagë e luftës që ende nuk është mbyllur.
Na kujton edhe përgjegjësinë që e kemi të gjithë, edhe institucionet shtetërore, edhe liderët politikë. E tërë shoqëria duhet të angazhohemi sa më shumë që kjo çështje të mbyllet sa më parë.
Unë mbetem i përkushtuar dhe në çdo instancë vazhdoj të kërkoj që çështja e të pagjeturve në Kosovë të zbardhet, për secilën familje, dhe kjo plagë të mbyllet.
E përkrahi çdo iniciativë, në Kosovë dhe në botë, që synon të fuqizojë të drejtat dhe liritë e njeriut dhe që lufton praktikat e abuzimit dhe të shkeljes së të drejtave të njeriut që rezultojnë me zhdukjen e personave.
Të gjithë duhet të gëzojnë të drejtën për drejtësi dhe për të ditur.”
Kryeministri në detyrë i Kosovës, Isa Mustafa, ka deklaruar se do kërkojnë nga Serbia që t’i hapë dosjet për të pagjeturit:
“Qeveria e Kosovës është munduar të bëjë zbardhjen e fatit të të pagjeturve. Kemi punuar edhe me partnerët ndërkombëtarë që Serbia t’i hapë dosjet”.
Ramush Haradinaj ka vënë kurora lulesh tek përmendorja dedikuar personave të zhdukur para Kuvendit të Kosovës me rastin e Ditës Ndërkombëtare të të pagjeturve. I dominuari për kryeministër nga koalicioni PAN ka thënë se çështja e të pagjeturve s`duhet të mbetet vetëm në nivel të diskutimit të familjarëve, por nevojitet angazhim më i madh i institucioneve.
Ndërkohë, kreu i PDK-së, Kadri Veseli ka thënë se Dita Ndërkombëtare e të Zhdukurve e gjen Kosovën me dhimbjen e saj të madhe, çështje kjo që duhet të zgjidhet menjëherë.
“Kjo plagë e madhe e luftës, e cila vazhdon të rëndojë mbi ne, duhet mbyllur sa më parë dhe ky duhet të jetë obligim i të gjithëve. Të gjithë ata që i kanë shkaktuar këto dhimbje të mëdha popullit të Kosovës, duhet të marrin përgjigjen e merituar”, ka shkruar Veseli në Facebook.
