Dita ndërkombëtare e demokracisë e gjen demokracinë shqiptare me një polaritet të theksuar të klasës politike dhe me probleme të shumëfishta social ekonomike. Ëndrra e studentëve të dhjetorit me moton “E duam Shqipërinë si gjithë Evropa” mbetet ende e largët.
Ilir Dizdari, njëri prej studentëve të dhjetorit që tronditi themelet e komunizmit, për t’i hapur rrugë Shqipërisë demokratike nuk e fsheh zhgënjimin për atë çfarë politika shqiptare ka prodhuar deri më tani.
“Për sa i përket demokracisë në Shqipëri më kujtohet një shprehje e Harry Fultzit që thoshte: Në kafenetë e Tiranës niveli diskutimeve politike është në nivelin akademik në SHBA. Ndërsa kur futen në politikë niveli politikës shqiptare nuk e kalon pragun e derës së shtëpisë. Lëvizja studentore shqiptare 90-91 bëri të mundur ardhjen e demokracisë në Shqipëri dhe sot është dita ndërkombëtare e demokracisë por nuk arriti dot për shkak se politika shqiptare u soll pikërisht me këtë aksiomë. Besimi demokracisë ka humbur për shkak të klasës politike dhe atyre çfarë ka bërë deri më tani. Ne duhet të ndryshojmë dhe për të ndryshuar duhet të jemi mbivetjak, tu kthehemi idealeve të dhjetorit dhe ta riformatojmë Shqipërinë siç duhet, si një vend evropian që të kemi mundësi të rithemi e duam Shqipërinë si gjithë Evropa”, tha ai për Top Channel.
