Ditën e djeshme Ramush Haradinaj u dorëhoq nga posti i tij si kryeministër i Kosovës. Ai deklaroi publikisht se vendimi për dorëheqjen erdhi pas thirrjes që ju bë për të dëshmuar në Gjykatën e Hagës.
Dje Haradinaj theksoi se ka dhënë dorëheqjen e pakthyeshme sepse dëshiron që të intervistohet si një qytetar i thjeshtë. Ndërkohë ditën e sotme, si qytetar i thjeshtë i Republikës së Kosovës, Ramush Haradinaj ka hequr kostumin, këpucët serioze dhe ka shkuar që të qëndrojë pranë familjarëve të tij.
Ka qenë vëllai i tij, Veton Haradinaj ai i cili ka bërë publike një foto në rrjetet sociale ku shfaqet ish-kryeministri teksa shijon disa momente të ngrohta me të afërmit e tij.
Kujtojmë se ish-kryeministri së shpejti do të paraqitet në dhomat e specializuara në Hagë, aty ku do të intervistohet si i dyshuar.
