Banorët e Unazës së Re kanë dalë sërish sot në ditën e 39-të të protestës, ku kërkojnë anulimin e projektit që parashikon prishjen e shtëpive të tyre.
Banorët janë vendosur në të dyja asket e rrugës pranë mbikalimit në këtë zonë, duke bllokuar qarkullimin e mjeteve, ndërsa dogjën edhe goma në rrugë.
Protestuesit kanë lëshuar thirrje kundër ARRSH-së, duke mos munguar as kërcënimet ndaj kësaj të fundit.
“I bëjmë thirrje ARRSH të mos afrohet, se do ta djegim për së gjalli, mos guxojë të afrohet”, tha njëra nga banorët e Astirit.
Mes protestuesve kanë qenë edhe artistët e teatrit dhe deputetët e opozitës.
“Kam 40 ditë që e denoncoj këtë aferë korruptive, paratë e këtyre banorëve po vidhen barbarisht. Për sa i përket dialogut, studentët janë në të drejtët e tyre, ftoj të gjithë qytetarët shqiptarë t’i mbështesin dhe t’i bashkohen”, u shpreh deputeti i PD-së, Klevis Balliu nga protesta.
Nga ana tjetër, edhe deputeti i LSI-së, Endrit Braimllari në të njëjtën linjë shprehu bindjen se do t’i shkojë aferës deri në fund.
“Është vërtetuar publikisht se është një aferë korruptive dhe ne do t’i shkojmë deri në fund për t’i përkrahur banorët”, tha Braimllari.
