Teksa është pyetur për largimin e Arben Ahmetajt nga çdo funksion politik, kryeministri Edi Rama tha se lojtarët në një skuadër lëvizin nga një vend tek tjetri. Në një intervistë për emisionin “Now” në Euronews Albania, kreu i qeverisë refuzoi të komentojë lajmet se Ahmetaj është larguar, pasi ka lidhje me aferën e inceneratorëve.
“Skuadra është dinamike, nuk është statike. Lojtarët në skuadër lëvizin në role të ndryshme, në pozicione të ndryshme. Dhe kjo s’ka asnjë lloj interesi publik. Është një lëvizje nga një vend në një vend tjetër”, u shpreh Rama.
Dikush nga mazhoranca ka nxjerrë informacione për aferën e incineratorëve
“Unë nuk hyj në këto se këto janë konsum i përditshëm, i vorbullës së një llumi që nuk mbaron. Sa në kanale e sa në portale. Gënjeshtra është bërë hata fare. Është e kot të humbas unë kohën”.
Një ditë më parë, Arben Ahmetaj foli jashtë dyerve të Parlamentit për “Vizion Plus”, pas largimit nga kabineti qeveritar. Vendimin e Kryesisë së Partisë Socialiste për t’i hequr së fundmi edhe drejtimin politik të qarkut të Vlorës, Arben Ahmetaj thotë se e priti me kënaqësi. “Me shumë kënaqësi. Riorganizimi është normal, ndodh shpesh, ka ndodhur, do të ndodhi, nuk ka ndonjë gjë të re”, ka thënë ai.
