Moti na ka surprizuar këto ditë, duke na lënë ndjesinë sikur vjeshta nuk do të vinte. Rreshjet e shiut kanë qenë të pakta, thuajse fare. Në fillim të nëntorit, temperaturat arritën deri në 27 gradë celsius. Por mesa duket, kjo situatë do të vazhdojë edhe përgjatë këtyre dy muajve të fundit të vitit.
Meteorologët thonë se deri në datën 20 nëntor, moti do të jetë i ngrohtë dhe pa reshje shiu. Mëngjesi dhe mbrëmja do të jenë pak të freskëta, ndërsa gjatë ditës termometri do të shënojë mbi 26 gradë.
Pas datës 20 nëntor, priten reshje lokale shirash, por jo në sasi të konsiderueshme. Kryesisht kjo do të ndodhë në zonat jugore dhe pjesërisht në zonat qendrore.
Sipas tyre, edhe dhjetori pritet të jetë i tillë. Dimri i vërtetë duket se është ende larg.
