Nikolla Dimitrov theksoi rëndësinë e të sjellurit si partnerë të Maqedonisë dhe Greqisë.
Gjatë një interviste në gazetën greke “Kathimerini”, Dimitrov tha se Maqedonia dhe Greqia dëshirojnë të jenë partnerë në BE dhe NATO në të ardhmen, prandaj u takon të sillen si të tillë.
Kjo deklaratë parapriu takimit katërpalësh në Selanik të Maqedonisë, Greqisë, Shqipërisë dhe Bullgarisë, i cili mbahet me iniciativë të ministrit grek, Nikos Kotzias.
I pyetur lidhur me çështjen e emrit, që përbën konflikt mes dy shteteve, Dimitrov u shpreh se të dy palët duhet të kenë qasje më të përgjegjshme, e cila do të ofrojë progres të vërtetë dhe ardhmëri më të mirë për qytetarët e të dy vendeve.
Ai theksoi se të dy vendet duhet të kenë mirëkuptim për pozicionet e ndryshme për çështje të caktuara.
“Kur një fqinj nga Maqedonia greke thotë se ajo ose ai është maqedonas, në mënyrë rajonale, historike ose kulturologjike, vallë kjo paraqet kanosje për mua? Gjithsesi se jo. Kur unë do të them se jam maqedonas, vallë kjo duhet të paraqesë kanosje për fqinjin tim? Në Evropë në shekullin 21? Konsideroj se nuk duhet”, theksoi ministri i Punëve të Jashtme i Maqedonisë.
