Nga: Anxhela Ferra
Besimtarët katolikë dhe ortodoksë festojnë sot Krishtlindjen, ditën e lindjes së Krishtit. Është një ditë ku përveç urimeve, shpërndahen edhe dhurata. Tirana Today pyeti sot qytetarët se si do t’i festojnë dhe çfarë dhurate duan të marrin.
“Të jetë një vit sa më i mbarë dhe me sa më shumë lekë.”
“Çfarë dhurate dua unë? Aa, vetëm një shishe raki, kaq kërkoj.”
“Se di i kam të gjitha pothuajse. Por, nëse do të kërkoja një dhuratë do të ishin disa lekë që të bleja çfarë do doja vetë.”
“Nuk kam nevojë për diçka materiale, dua vetëm gjëra shpirtërore. Ajo është të duam njëri-tjetrin sa më shumë.”
Teksa të rritur janë të ndarë në dëshirat e tyre, ku disa kërkojnë dhurata materiale e të tjerë janë më shpirtëror. Ndryshe ndodh me fëmijët, të cilët i kanë idetë më të qarta. Disa duan kukulla e të tjerë me dëshira pak më të kushtueshme si telefona.
“Deri tani kam marr një telefon dhe një arush të madh. Pres për dhurata të tjera.”
“Dua për dhuratë një iPhone, se tani kam një Samsung. ”
“Le të jetë çfarë të dojë, për mua mjafton të jetë një dhuratë. Por, do të më pëlqente një kukull barbi.”
“Do të doja një lojë të re dhe një telefon të ri. Edhe pse unë tani kam S8, do të doja të kisha S9.”
Por, përballë këtyre është dhe një realitet tjetër. Janë ata fëmijë kërkesat e të cilëve janë shumë modeste. Madje në shumë raste bazike, ku bëhet fjalë për ushqimin e gojës. Ato nuk kërkojnë një telefon sepse as nuk e ëndërrojnë ta kenë. Kërkojnë vetëm bukë të hanë.
Edhe pse i shohim çdo ditë në rrugë duke lypur herë vetëm e herë me prindërit, në këto ditë festash, këta fëmijë e vuajnë më shumë se kurrë pamundësinë e tyre.
“Unë po pres të vijë Babagjyshi dhe të më japi një dhuratë. Unë do të doja një kukull me karrocë. Vjet nuk më dha asnjë dhuratë, nuk e di nëse këtë vit do të më sjellë. Dhe pse sot është festë do të hamë ato çfarë kemi, nuk bëjmë naze.”
“Unë për veten time asgjë nuk dua. Por, për fëmijët do të doja t’i bëja nga një dhuratë. Shkova te një festë, por nuk kishte që të hanin fëmijët e mi. I mora dhe i thashë hajde të ikim, se këta nuk po na japin gjë. Ne sot për Krishtlindje nuk kemi asgjë për të ngrënë”, rrëfen për Tirana Today një nënë. Ndërkohë që fëmija e saj kërkon vetëm një libër, stilolaps dhe ngjyra. Kaq, do ta gëzonte.
“Çfarë dhurate do të marrim, duke lypur?! Dolëm të lypnim që të bënim ndonjë lekë për të marr bukë. Ndjehem shumë keq që nuk kam mundësi t’i blej dhe unë fëmijëve të mi, që të gëzojnë dhe këta. Nuk mbaj mend cila ka qenë dhurata e fundit që i kam bërë djalit, pasi nuk i kam bërë asnjëherë.”
“Unë dua një makinë dhe bukë”, -janë këto fjalët e një vogëlushi i cili qëndron në derën e Kishës me shpresën se njerëzit do t’i japin ndonjë lekë më shumë. Që edhe ai të festojë ndoshta jo si fëmijët e tjerë. Por, të paktën të mundet të hajë, të paktën sot./ TIRANA TODAY
