Pas gazetareve Mira Kazhani dhe Bieta Sulo, edhe këngëtarja Zaimina Vasjari është bërë specialiste e ujësjellësve. Duke iu referuar dokumentit ku spikat emri i saj, këngëtarja seksi e skenës shqiptare është emëruar për të “zgjidhur hallet” e Shijakut me ujë të pijshëm.
Pas arkitekturës dhe bizneseve që ajo ka promovuar së fundmi, këngëtaren e gjejmë tashmë në një tjetër fushë, për të cilën ka surprizuar jo pak. U bë një kohë e gjatë që këngëtarja nuk shihet më nëpër videoklipe. Madje mungon prezenca e saj edhe në skenë.
Në dokumentin e bërë publik, ajo figuron e punësuar si specialiste në drejtorinë e Ujësjellës Kanalizime në Durrës, në degën e Shijakut. Këngëtarja është emëruar në këtë detyrë prej datës 10 qershor, ndërsa vendimi mban firmën e drejtorit të Ujësjellësit, Spartak Kovaçi.
Dy vite më parë, ndërmarrja e Ujësjellës-Kanalizimeve Tiranë kishte paguar gazetaret Mira Kazhani dhe Bieta Sulo, si këshilltare.
Mira Kazhani ishte punësuar në UKT, si këshilltare ekonomike, me një pagë prej 83 mijë lekësh në muaj, ndërsa gazetarja e “Top Channel”, Bieta Sulo, ishte e punësuar në të njëjtën ndërmarrje si Kazhani, në detyrën e specialistes, me një pagë prej 55 mijë lekësh, por më pas u largua.
Në muajin maj të vitit 2020, në një intervistë për “Real Story”, kryetari i Bashkisë së Tiranës, Erion Veliaj, u pyet ndër të tjera edhe për këtë çështje.
“[…] Përsa i përket një kompanie siç është UKT-ja që është një nga kompanitë më të mëdhaja sot në kryeqytet, ndoshta pas OSSHE-së, ka nevojë gjithmonë për të marrë këshilltarë, specialistë mediash, konsulentë, ekspertë kredie, ekspertë kontabël, pra më të mirët që ka tregu. Kjo është një gjë që ndodh tipikisht”.
Kryebashkiaku u shpreh se gazetarët kudo në botë “punojnë rregullisht për kryetarët e bashkive apo kompanitë e qyteteve për [të ndihmuar] se si të komunikojnë me publikun përsa i përket vendimeve dhe reformave”. /Tirana Today
