Wanna Marchi dhe Stefania Nobile janë dy shtetase italiane, nënë e bijë, të cilat kanë rifilluar jetën e tyre në Shqipëri. Ka qenë një kuriozitet i madh për të ditur se ku kishin përfunduar dy personazhet, të cilat ishin bërë protagoniste të kronikës italiane në vitin 1983 dhe kishin shokuar opinionin publik italian të asaj kohe.
https://youtu.be/Jdmupql09Ok?t=1
Marchi dhe e bija ishin bërë “eksperte” të mashtrimit të shitjeve të produkteve false për dobësim të femrave mbipeshë e të tjera të ngjashme, të realizuar përmes teleshitjes në televizione të ndryshme. Ishte një periudhë e artë kohore, kur dy gratë u konsideruan edhe si “mbretëresha të teleshitjeve” në Itali.
Gratë u denoncuan në emisionin investigativ “Striscia la notizia” ku njëra nga viktimat provonte mashtrimin e dy zonjave. Drejtësia italiane, më pas, do i dënonte dy gratë me nga 10 vite burg dhe një dëmshpërblim prej 2 milion eurosh.
Marchi dhe e bija kanë qenë të ftuara mbrëmjen e djeshme në “Maurizzio Costanzo Show” që jepet nga rrjeti televiziv “Mediaset”, ku kanë folur për jetën e tyre të re.
Jeta në Shqipëri
Prej disa muajsh dy italianet nuk jetojnë në Itali, njëra për arsye pune dhe tjetra për arsye “zemre”. Ato jetojnë në Shqipëri prej 5 muajsh dhe janë tepër të lumtura me jetën e re.
“Gjërat shkojnë shumë mirë, është një vend shumë i qetë dhe jetohet shumë mirë. Vajza ime është duke hapur një biznes dhe unë për të shkoj dhe atje ku jetojnë arinjtë, pra shkoj kudo”.
Pra është një zgjedhje e Stefanisë jeta e rifilluar në Shqipëri dhe nëna e saj ka vendosur ta ndjekë pas. Ndërkohë ato kanë njëkohësisht dhe një lokal në Milano.
Maurizio Costanzo i ka pyetur zonjat nëse në Shqipëri ato i janë rikthyer televizionit, siç bënin më parë në Itali, por Wanna Marchi ka mohuar një rikthim të saj në televizion. Ajo vazhdon jetën e saj në Shqipëri, pranë vajzës, si një shtëpiake e paangazhuar. TIRANA TODAY
