Ti hapje derën e t’i jepje bukë një miku të vjetër që regjimi komunist e kishte shpallur armik, do të thoshte se i kishe hapur derën njëkohësisht pushkatimit, djegies së shtëpisë dhe persekutimit të gjithë familjes.
Raporti i Musa Dacit, mbi krimet e kryera nga komunistët në shtator-tetor 1946, në malësitë e Shllakut, Shoshit, Dushmanit etj, në shtator-tetor 1946 etj. vijon me të njëjtën gjuhë urrejtjeje ndërsa ai liston shtëpitë e djegura në këto zona vetëm pse të zotët u kishin hapur shtëpitë dhe ju kishin dhënë bukë të arratisurve prej regjimit të Hoxhës.
Pjesa e dytë e raportit titullohet “Personave që u janë djegur shtëpijat” dhe parashtron emrat e 7 burrave, që gjatë 29 shtatorit deri më 2 tetor, u ishin djegur shtëpitë në shenjë hakmarrjeje, pse kishin ndihmuar të arratisurit apo pse nuk i ishin përgjigjur thirrjes për të dorëzuar armët. Kujto.al e sjell të plotë, zbardhur sipas origjinalit, këtë pjesë të raportit mbi shtëpitë e djegura, brenda 4 ditëve nga njësitë e Mbrojtjes së Popullit në fshatrat Palaj Shosh, Tetaj, Curaj Epër, Kir Pult, Benë Shllak, Mollë Shosh etj.
Personave që u janë djegur shtëpitë
Kol Delisë nga katundi Palaj Shoshit i kanë djegur shtëpinë me datën 26/9/1946 për arsye se në këtë datë në atë katund u bë përpjekja e datës 25 kundër Gjergj Vatës e Mark Malës me çetën e tyre kanë ngrënë bukë në shtëpinë e tija dhe kur ju kërkua pushka, nuk e dorëzoi pastaj i doli revolja e ju dogj shtëpija, e cila ndihmoj mjaft për dorëzimin e armëve etj – dhe u arrestua.-
Uk Çunit nga katundi Tetaj, ky u pushkatua dhe ju arrestua i vëllaj Gjelosh Çuni pse kishte strehuar me muaj rresht ilegalët për të bërë mesionë që të mos strehohen kriminelët nga populli më datën 29/9/1946 i dogjëm edhe shtëpinë këtij, e cila bën mjaft efekt në lidhje me mos strehimin e ilegalvet.-
Isuf Sadikut nga katundi Curaj Epër i asht djeg shtëpija me datën 3 ose 4/ 10/1946 të cilën e ka djeg njësiti që operon në atë zonë pa autorizim kjo asht djegë pse nuk ka ardh në mbledhjen e datës 29/9/1946 ku duhet të vinte e të dorëzonte pushkën që ka të fshehur. Ky jo vetëm që nuk u paraqit në mbledhje por dhe kur ju kërkua arma nuk e dorzoji.
Mark Noshit. Nga katundi Kirë Pult ju doq shtëpia më datën 2/X/1946 pse ky jo vetmë që nuk u paraqit në mbledhjen që u bë në Pult për dorëzimin e armëvet, por mas të gjith meshkujt e shtëpisë ca shok të tjerë e u arratis, dhe si këshilltarë u mundue ta bënte popullin që të mos tregonte armët shtëpia e këtij u doqë mbas një afati të caktuarë në datën 2/X/1946.
Vat Prendushit nga katundi Benë Shllak të cilit u doq shtëpija më: datën 2/X/1946 pse më datën 29 u arrestua me gjithë të vëllezërit, të cilët mbasi i maroj afati i caktuarë e nuk u dorëzua të cilit ju doq shtëpia.
Hilë Markut. Nga katundi Shllak të cilit ju legalizua i biri mbasi i maroj afati i dhanun për t’u djegur me datë 3/X/1046
Pjetër Kocës nga katundi Mollë i Shoshit djegë shtëpija më datën 2/X/1946 pse ky kur njësiti i kapiten Xhelos shkoi për të kryer veprimin për kontrollimin e ca vendeve ku ishin ilegalë të mësheftë në këtë kohë ky u arratisë me gjithë të vëllanë e me ca kushërinj, të cilët pastaj ju dogj shtëpija.
