Nesër do të mbahen sërish zgjedhje në Komunën e Çairit, pasi do të rivotohet në vendvotimin 2901, ku kanë të drejtën e votës 719 votues.
KSHZ votoi unanimisht pro rivotimit në Çair, bazuar në vendimin e Gjykatës Administrative, e cila konstatoi shkelje në vendvotimin 2901 në Çair.
Edhe Lëvizja Besa kishte raportuar për shkelje, duke denoncuar se në kutinë e votimit ndodhej një fletëvotim më tepër nga numri i personave që kishin nënshkruar në listën zgjedhore.
Në rrethin e dytë të zgjedhjeve, në këtë vendvotim kanë votuar 278 persona, ku kandidati i Lëvizjes Besa, Zeqirija Ibrahimi mori 164 vota, ndërsa kandidati i BDI-së, Visar Ganiu mori 98 vota.
Në rrethin e dytë të zgjedhjeve lokale, në komunën e Çairit, fitues i zgjedhjeve ishte Visar Ganiu nga BDI-ja i cili arriti të grumbullojë gjithsej 13.916 vota kundrejt Zeqirija Ibrahimit nga Lëvizja Besa, i cili arriti të grumbullojë 13.707 vota.
