Kryeministri i Kosovës, Avdullah Hoti ka thënë se marrëveshja finale për dialogun me Serbinë do të bazohet në kushtetutë.
Hoti deklaroi se pas nënshkrimit të marrëveshjes finale me Serbinë, menjëherë duhet të ndodhë njohja reciproke, njohja nga pesë vendet e Bashkimit Evropian, anëtarësimi në Organizatën e Kombeve të Bashkuara, si çdo vend tjetër, shfuqizimi i rezolutës 1244 dhe të ecet tutje në procedurat e integrimit euroatlantik.
Kryeministri Hoti tha se nuk i di prapaskenat e dialogut dhe se nuk do të flitet për shkëmbim të territoreve.
“Kam kërkuar nga partnerët tanë në ditën e parë të detyrës, në telefonatat në Berlin, Paris, Uashingon, Brukel, kam kërkuar si kryeministër të di ku ka arritur procesi. Përgjigja e tyre ka qenë se nuk ka arritur askund, dhe se do të uleni si dy shtete të pavarura që do të negocioni për një marrëveshje gjithëpërfshirëse që çon te njohja reciproke.
Marrëveshja duhet të jetë në përputhje me Kushtetutën. Të gjithë partnerët e konfirmojnë që Kosova të ulet për njohje reciproke dhe normalizim të marrëdhënieve. Dialogu tash zhvillohet për njohje reciproke dhe si derivat edhe për normalizim të marrëdhënieve”, tha ai.
Kujtojmë se më 27 qershor, kryeministri Hoti do të vizitojë Shtëpinë e Bardhë, për të marrë pjesë në takimin ndërmjet dy palëve, Kosovës dhe Serbisë.
