Nga Durrësi, ku kreu i shtetit ishte për të përkujtuar rezistencën anti-fashiste, ai tha se zgjidhja e krizës bëhet vetëm me dialog të përgjegjshëm. Meta, dhe një herë tjetër nënvizoi faktin se nuk duhen bërë hapa pas, dhe se mes palëve duhet të gjendet hapësirë për zgjidhjet e mundshme.
“Jam këtu për të kujtuar Mujo Ulqinakun. Sa i përket krizës, besoj tek dialogu i përgjegjshëm për të normalizuar situatën politike. Nuk duhet të bëjmë hapa pas, për shkak të kokëfortësisë.
Pas vitit ’97, vendi ka bërë përparime të rëndësishme. Këto përparime nuk duhet të shkojnë dëm. Duhet të gjendet hapësirë për zgjidhjet, secili të reflektojë. Është detyra e tyre të tregojnë vullnet real për dialog, për të vendosur normalitetin kushtetues”, theksoi presidenti Meta.
