Ministri i Brendshëm, Sandër Lleshaj, në një deklaratë për mediat tha se për asnjë arsye nuk justifikohet dhuna ndaj policisë, duke sjellë në fokus faktin se jeta e tyre ishte në rrezik. Gjatë protestës, tha Lleshaj, u përdorën mjete piroteknike të ndaluara, e ku për pasojë, me dhjetëra policë janë shtruar në spital nga plagët e marra.
Teksa ka komentuar dhunën ndaj Sait Dollapit, Sekretarit Organizativ të PD-së, ministri shtoi se policia për këtë rast duhet të kishte duruar për pak çaste, edhe pse ai bëri rezistencë.
“Bomba molotov, kapsolla, gjatë përpjekjeve për të djegur institucionet, flakët dhe goditjet rrezikuan seriozisht punonjësit e policisë.
Sulmet e djeshme u përballuan falë përkushtimit dhe profesionalizmit të panjohur më parë të Policisë së Shtetit.
Ata burra e gra meritojnë respekt dhe vlerësim. Për orë të tëra përballuan qindra bomba molotov, e qindra mjete të tjera.
Dhe ata që u angazhuan në ndalim e Sait Dollapit, të kishin bërë diçka ndryshe. Të kishin duruar dhe pak sekonda në ndalimin e personit në fjalë.
Por nuk mund të justifikohet histeria e zjarrit që u derdh mbi institucionet.
U bëj thirrje të gjithëve për reflektim të thellë, ndaj përpjekjeve për destabilizim”.
