Një rast i dhunës ndaj kafshëve, konkretisht ndaj një qeni, ka bërë bujë në media. Lidhur me rastin ka reaguar edhe ish-ministri i Brendshëm, Saimir Tahiri, i cili shkruan se po rritet një racë e dhunshme që mund të jenë kërcënim për shoqërinë.
Ndër të tjera, Tahiri deklaron se para një vit kishte propozuar një projekt ligj për mbrojtjen e kafshëve nga dhuna, por sipas tij, “parlamenti nuk dëgjon”.
“Më mbetet ta risjell përsëri në vëmendje, me shpresën se të gjithë ata që nga kjo e sotmja janë neveritur e frikësohen nga e ardhmja, të gjejnë kohe të bëhen bashke e të detyrojnë parlamentin të marrë në shqyrtim e të miratojë një ligj për të ndalur përfundimisht masakrën ndaj kafshëve”, shkruan Tahiri në Facebook.
Ndërkohë, lidhur me këtë nismë, deputeti i LSI-së Luan Rama ka shprehur mbështetjen e tij, teksa ka komentuar:
“Akt makabër, i shëmtuar deri në neveri, parathënie e një krimineli që po vjen! Duke u solidarizuar me shqetësimin tënd qytetar, më ke në krah për projektligjin për mbrojtjen e kafshëve!”
