Dhoma e Avokatëve të Shqipërisë ka reaguar menjëherë pas deklaratës së Ramës, se harta e re gjyqësore nuk ndryshon. Kryeministri u pyet gjatë një konference në lidhje me hartën e re gjyqësore. Kreu i qeverisë tha se harta është e konsultuar dhe nuk do të ndryshojë. Sipas tij, Shqipëria është një vend i vogël dhe nuk mund të ketë institucione të panumërta. Këtë qëndrim, Dhoma e Avokatëve të Shqipërisë e konsideron të pavend, pasi sipas tyre, asgjë nuk i është kërkuar Qeverisë por Këshillit të Lartë Gjyqësor.
“Dhoma e Avokatisë i ka kontestimet për vendimin e KLGJ, qeveria s’ka të bëj me hartën 1 apo 4 apele ka vetëm faturën financiare. Dhoma e Avokatisë s’është e vërtet që s’kemi kërkuar zgjidhje, jemi për zgjidhje me mirëkuptim e që i përshtatet jo vetëm publikut por edhe interesit e realizimit të drejtësisë. Kemi kohë që kërkojmë të ulemi, por s’na dëgjojnë. Bojkoti s’është presion, është zëri ynë të na dëgjojnë e të ulemi”, thuhet në reagimin e kryetarit të Dhomës, Maksim Haxhia.
