Prej gati 3 dekadash, ish të burgosurit dhe të përndjekurit politikë, kanë kërkuar drëjtësi. “Dosjet”, janë përdorur shpesh në politikë për të sulmuar kundërshtarin. Procesi i hapjes së tyre ka nisur prej disa kohësh, por është tepër i ngadaltë. Për me tepër, dyshohet se shumë nga dosjet më të rëndësishme, ato që do të kompromentonin njerëz të rëndësishëm politikë, janë asgjësuar.
Vetëm pak ditë pas shpalljes së pluralizimit politik, Ministri i Brendshëm, Hekuran Isai, urdhëroi zhdukjen e shumicës së dosjeve të Sigurimit. Një lëvizje kjo e qartë, për të fshehur gjurmët e krimeve.
“Të asgjësohen pa pritur përfaqësuesin e ministrisë, të gjitha dosjet e bashkëpunëtorëve, të përpunimeve dhe dosje të tjera, që janë veçuar për asgjësim si dhe kartelat e kontigjenteve të hequr, librat e evidencës të punëtorëve operativë të hequra nga përdorimi, dhe dokumenteve të përkohshme të veçuara për asgjësim të shkallës sekret.Veprimet të kryhen menjëherë”- thuhet në shkresën e Isait, që mban datën 15 dhjetor 1990.
Mendohet që në pak ditë, të jenë asgjësuar rreth 29 000 dosje. Ndërkohë ish-drejtues të Shërbimit Informativ, kanë pohuar se asgjësimi i dosjeve vazhdoi edhe gjatë viteve 1991-1992.