Ish-deputeti i Partisë Demokratike Besnik Mustafaj është shprehur se dezertimi i katër komandove shqiptarë nuk është ndonjë hata, pasi ky është një fenomon që mund të ndodhë në të gjitha ushtritë e botës.
Por sipas tij, shqetësuese është fakti se shumë ushtarë shprehin dëshirën për t’u larguar nga ushtria. “Ne jemi një ushtri e NATO-s me një numër të vogël ushtarësh. Në momentin që jemi anëtarësuar në NATO, duhet që 2% e GDP-së të shkojë për kërkesat e ushtrisë. Ky 2% jonë është me thërrime. Në kohën e Partisë Demokratike ishte rreth 1.9 për qind, por gjatë këtyre 4 viteve kemi parë që ka zbritur në 1% ose 0.9%”, tha ai për “News24”.
Mustafaj shtoi se kjo ndikon drejtpërdrejt në pagesat e ushtarëve. “Përkushtimi, lodhja, rrezikshmëria e ushtrisë sonë është në të njëjtin nivel me ushtritë e të tjera, por paga është shumë më e ulët. Ne kemi një ushtri profesioniste dhe pagesa merr një kuptim shumë të madh dhe bëhet një burim shumë i madh që të ndodhë një gjë e tillë”, shtoi ai.
