Detaje të reja janë zbuluar lidhur me gjetjen e një gomoneje në Vlorë, e cila ishte e mbushur me kanabis.
Mësohet se sasia e sekuestruar nga policia është rreth 1.5 ton kanabis sativa, e cila ishte gati për t’u transportuar. Megjithatë, dyshohet se trafikantët e kanë braktisur gomonen 8 metra të gjatë, pasi ajo pësoi avari.
Deri më tani nuk ka asnjë të arrestuar, ndërsa policia vijon hetimet.
NJOFTIMI I POLICISE:
D.V.P.Vlorë në bashkëpunim me Policinë Kufitare, Delta Forcë, QNOD dhe Guardia di Finanza vijojnë kontrollet për parandalimin e trafikimit të narkotikëve përtej kufirit.
Gjatë kryerjes së këtyre kontrolleve, disa milje larg ujrave ndërkufitare mbrëmë u konstatua një gomone rreth 8 metra e gjatë me sasi të konsiderueshme kanabisi. Gomonia ishte në kërkim, bazuar në informacionet e siguruara për lëvizjen e saj në det.
Shërbimet policore po transportojnë lëndën narkotike pranë ambienteve të saj, për të bërë peshimin e saj. Gjithashtu po vijon puna për identifikimin dhe kapjen e autorëve të kësaj vepre penale.
