Detaje të reja janë hedhur në dritë referuar të shtënave me armë drejt mjetit të një 29-vjeçari, i cili rezulton i dënuar në vitin 2008 për grabitje me armë në kazino, si edhe vjedhje të tjera në qarkun e Korçës. Ngjarja është shënuar mbrëmjen e së dielës (24 shkurt) në Korçë, kur është qëlluar me armë zjarri në drejtim të një makine e cila ishte parkuar në rrugë.
Dyshimet paraprake, ende jo zyrtare janë për një konflikt të vjetër mes autorëve dhe shënjestrës, Mateo Aliko, ndërsa makina ishte në pronësi të të atit, Albert Aliko.
Policia ka shoqëruar 15 persona në polici, ndërsa autorët e ngjarjes nuk janë identifikuar ende. Dyshohet se nuk janë nga Korça.
Në vendin e ngjarjes janë gjetur 5 gëzhoja, dhe nga të shtënat është thyer xhami i një banese.
