Dalin detaje të reja lidhur me vrasjen e dyfishtë që ndodhi dje në Shkodër, ku u ekzekutuan vëllezërit Bilali.
Mësohet se njëri nga këta të fundit, në momentin e vrasjes, ka qenë i armatosur. Kur autorët e vrasjes kanë qëlluar në drejtim të viktimave, 59-vjeçari Astrit Bilali u është kundërpërgjigjur duke qëlluar me pistoleta.
Kjo vërtetohet jo vetëm nga dëshmitë, por edhe nga gjetja e gëzhojave në vendin e ngjarjes, si dhe arma pistoletë e gjetur pranë trupit të viktimës.
Po ashtu, blutë e Shkodrës kanë dhënë informacion edhe sa i takon makinës së vjedhur, teksa bëjnë me dije se veç targave të falsifikuara, ky mjet është deklaruar i vjedhur që në muajin dhjetor të 2018-ës. Brenda mjetit tip Benz është gjetur edhe arma tip automatik, e cila u përdor për vrasjen e dy vëllezërve Bilali.
Duket se autorët e kanë planifikuar mirë krimin, duke u kujdesur që të mos lënë asnjë gjurmë prapa.
Policia ka shoqëruar deri më tani mbi 15 persona, ndërsa autorët ende nuk janë identifikuar.
