Rikthehen sërish grabitjet me maska. Një rast i tillë është shënuar në Shkodër, ku tre autorët kanë goditur disa herë një 62-vjeçar dhe i kanë kërkuar para. Shtetasi Agron Veseli, 62-vjeç, ka marrë plagë në kokë, fytyrë dhe trup.
Tre persona të maskuar dhe të armatosur kanë shkuar për të grabitur atë, por historia të ngjan si në ato në filma, pasi ata janë përplasur me forcat e policisë.
Ngjarja, fatmirësisht pa viktima, ka ndodhur në afërsi të shkollës 9-vjeçare “Ismail Qemali”. Grabitësit kanë hyrë brenda shtëpisë, kanë goditur disa herë 62-vjeçarin dhe i kanë kërkuar para. Ata e kanë kërcënuar me jetë, por pronari i shtëpisë ka shfaqur rezistencë.
Pas një njoftimi nga komshinjtë, policia ka mbërritur në vendin e ngjarjes në kohë reale. Pas një përleshje fizike me policinë, policia ka arrestuar dy nga hajdutët.
62-vjeçari që u sulmua duke tentuar ta grabisin, ka marrë plagë të shumta. Ai menjëherë është transportuar për në spitalin e Shkodrës, për marrjen e mjekimeve të nevojshme.
Policia
“Falë reagimit të shpejtë të policisë, arrestohen në flagrancë dy nga autorët e grabitjes. Nga shërbimet të Komisariatit Policisë Shkodër, Forcës Posaçme Shqiponja të D. V. P. dhe FNSH në lagjen Kongresi i Përmetit, Shkodër, është arrestuar në flagrancë shtetasi Pllumb Kolbuçaj, 45-vjeç, banues në lagjen Guerile, Shkodër, Abdullah Hardhiçaj, 53-vjeç, banues në lagjen “Ahmet Haxhija”, Shkodër.
Keto shtetas u arrestuan pasi dyshohet të ketë qenë autorë të grabitjes, të cilët së bashku me një shtetas tjetër, kanë tentuar të vjedhin me dhunë banesën e shtetasit A. V., 62-vjeç, me të cilin janë konfliktuar fizikisht, duke i shkaktuar dëmtime, jashtë rrezikut për jetën.
Gjithashtu është identifikuar edhe autori i tretë, i cili u shpall në kërkim, shtetasi F. Sh. 20-vjeç, banues në Shkodër.
Shtetasve të lartpërmendur, në momentin e arrestimit ju gjet maska, doreza, dhe një levë hekuri të cilat u sekuestruan në cilësinë e provës materiale.
Vijojnë hetimet për dokumentimin e plotë të kësaj ngjarje”.
