Prokurorët e SPAK që kanë drejtuar hetimin pasuror të Ylli Ndroqit janë Vladimir Mara dhe Dritan Prençi. Dy prokurorët kanë kërkuar sekuestrimin e pasurive të Ylli Ndroqit, ndërsa vendimi është marrë nga gjyqtarja Etleva Delia, raporton “ABC News”.
Për administrimin dhe përdorimin e këtyre pasurive ngarkohet Agjencia për Administrimin e Pasurive të sekuestruara dhe konfiskuara pranë Ministrisë së Financave. Vendimi do të ekzekutohet nga tre Oficerë të Policisë Gjyqësore, pranë Drejtorisë së Policisë së Tiranës dhe SPAK.
Avokatët e Ndroqit e cilësojnë si një sulm politik, duke paralajmëruar apelim të tij brenda 5 ditëve të ardhshme.
Ylli Ndroqi do të ankimojë vendimin e Gjykatës së Posaçme të Shkallës së Parë për Korrupsionin dhe Krimin e Organizuar, e cila vendosi sekuestro të pasurive në ngarkim të tij dhe familjarëve.
Mesditën e sotme, në një prononcim për median, avokatët e Ylli Ndroqit thanë se në shkallët më të larta gjyqësore do të vërtetohet që pasuria e Ndroqit është vënë në mënyrë ligjore dhe jo siç pretendon SPAK.
Ndërkohë një nismë e tillë merret në kohën kur presidenti i “Yldon Media Group”, ndodhet në gjyq me kryetarin e Bashkisë, Erion Veliaj.
