Policia ka zhviluar paraditen e sotme operacionin e koduar “Porti i Pastër” në Portin e Durrësit. Gjatë operacionit në fjalë, janë përfshirë forca nga Departamenti për Kufirin dhe Migracionin, Departamenti i Policisë Kriminale, Departamenti i Sigurisë Publike dhe Drejtoria e Forcës së Posaçme Operacionale në Policinë e Shtetit.
Po kështu, burime zyrtare të policisë konfirmojnë se gjatë operacionit janë përdorur edhe 10 qen antidrogë si dhe 2 drone. Mësohet se janë kontrolluar 106 kontejnerë, 65 magazina dhe objekte të ndryshme brenda Portit, dhjetëra mjete lundruese, kryesisht peshkarexha, 345 automjete dhe rreth 770 persona.
Gjatë kontrolleve, u sekuestruan në cilësinë e provës materiale 1 pistoletë zhurmuese, thikë, vula të falsifikuara, targa mjetesh të falsifikuara, dokumente të kundërligjshme, si dhe sasi me cigare kontrabandë. Policia ka shoqëruar për veprime të mëtejshme 23 persona.
