Drejtuesja e Prokurorisë së Tiranës, Elisabeta Imeraj, në një deklaratë për mediat njoftoi se janë evidentuar katër autorë që dyshohet të kenë gisht në skandalin e publikimit të pagave të qytetarëve. Ajo bën me dije se të dhënat janë marrë nga një specialiste IT-je, e cila ia ka shpërndarë kolegut të saj, që i ka shitur te subjektet private. Imeraj, teksa ka zbuluar rrjetin, theksoi se janë arrestuar dy persona të punësuar në institucione shtetërore e dy të tjerë në sektorin privat.
Në pranga kanë rënë dy specialistë të IT të Drejtorisë së Përgjithshme të Tatimeve dhe dy përfaqësues të subjekteve private. Drejtuesja e Prokurorisë së Tiranës, Elisabeta Imeraj, tha në një konferencë shtypi se dy specialistët e IT kanë shpërdoruar detyrën duke nxjerrë të dhënat e qytetarëve, dhe më pas ua kanë shitur subjekteve private kundrejt përfitimit monetar.
Andi Agaraj dhe Eni Qirjako janë dy specialistët e IT te Drejtoria e Tatimeve, të cilët morën të dhënat personale për mbi 650 mijë qytetarëve, duke ja shitur më pas dy përmbaruesve, Klodian Sota dhe Endri Ikonomi.
“Janë kryer veprimet hetimore në mënyrë intensive. Është vijuar me sekuestrimin e serverave, kompjuterave duke dalë në përfundimin e një dyshimi të arsyeshëm të bazuar në prova. Kemi zbuluar katër autorë të ngjarjes.
Dy janë punonjës në Drejtorinë e Tatimeve, punonjës IT. Ka dyshime se të dhënat kanë rrjedhur prej tyre, Specialistja e IT e punësuar te AKSHI duke pasur akses në të dhënat personale, ka hyrë duke marrë këto të dhëna personale dhe i ka shpërndarë te kolegu i saj i cili ka shfrytëzuar këto të dhëna dhe ia ka shitur këtyre subjekteve.
Punonjës të caktuar kanë arritur të shfrytëzojnë detyrën e tyre. Prokuroria vazhdon hetimet intensive. Sekuestrimi është bërë në Drejtorinë e Tatimeve dhe në DPSHTRR pas daljes së listës së targave”.
