37-vjeçari nga Kamza, Roland Kryemadhi, i cili u kthye në personazh pak ditë më parë, duhej të paraqitej në gjykatë si i pandehur.
Policia shkoi në shtëpinë e tij për ta shoqëruar, sipas një vendimi gjykate, ku ai ishte i pandehur për keqtrajtimin e fëmijëve.
Sapo ka parë uniformat blu, ai është bërë nervoz. 37-vjecari ka mbyllur derën, duke goditur një polic me shkelm në bark dhe ka mbyllur derën duke u ngjitur në tarracën e katit të dytë të kësaj banese. Në dorë me një pistoletë, kanë dëshmuar policët, ai na u drejtua me fjalët “pasha Allahun, largojuni këtu se do ju vras”.
Në këtë moment, operacioni për kapjen e tij është ndalur dhe është njoftuar nga patrulla reparti RENEA, i cili pas mbi 40 minutave negocim ka bërë të mundur kapjen e tij.
Kryemadhi do të dalë të dielën para gjykatës, për tu njohur zyrtarisht me akuzat, ndërsa prokuroria ka kërkuar ndaj tij masën ‘arrest në burg’.
Roland Kryemadhi njihet në zonë si një besimtar mysliman dhe ekstremist. Në dosjen e prokurorisë lidhur me atë se çfarë ndodhi në 3 qershor, thuhet se fillimisht policia ka shkuar në banesën e tij në rr. “Washington” Kamëz, dhe kanë trokitur.
Por, pasi nuk është përgjigjur njeri, ata u nisën për t’u larguar, por janë përballur me vetë Kryemadhin që po vinte drejt banesës së tij me biçikletë. Nga policia i është kërkuar të vinte me ta, pasi duhet të shoqërohej në gjykatë në zbatim të urdhrit të gjyqtarit, por ai ka reaguar me nervozizëm ndaj punonjësve të policisë të cilët ishin me uniformë.
