30 mijë euro dyshohet se është shuma për të cilën janë paguar personat e prangosur, për ekzekutimin e Jurgen Kurtit tetë ditë më parë. Tre persona që kanë marrë pjesë në ekzekutimin e të riut në hyrje të pallatit ku jetonte me nënën, u vunë në pranga sot nga Policia e Tiranës, si autorë të paguar për vrasjen.
Një i katërt, dyshohet të ketë pasur rolin e koordinatorit. Vrasësit me pagesë ia morën jetën 26-vjeçarit poshtë shtëpisë së tij, i cili njihej si biznesmen dhe menaxher i personazheve të njohur të show-bizzit. Ende nuk dihet se kush është personi ose personat që ka dashur kokën e Jurgen Kurtit, e ndërsa pista kryesore e hetimeve është hakmarrja.
Burimet bëjnë me dije se ndërsa tre të arrestuarit janë ekzekutorë me pagesë dhe pjesëmarrës në krim, personi i kërkuar mësohet nga burime për ‘Report Tv’, se ka pasur rolin e koordinatorit.
Policia e Tiranës, në bashkëpunim me Prokurorinë e kryeqytetit, arrestuan Esli Levendi, 21 vjeç, lindur në Athinë/Greqi dhe banues në Tiranë, Alesio Berberi, 33 vjeç, lindur në Patos, Olsi Qalliaj, 22 vjeç, lindur në Fier dhe banues në Patos. Tre autorët e arrestuar janë vrasës me pagesë, dhe se ekzekutimin e Kurtit e kanë bërë me porosi, për llogari të një personi tjetër. Autorët e kanë ndjekur për më shumë se dy javë Jurgen Kurtin, ndërsa dyshohet se kanë marrë 30 mijë euro për ekzekutimin e tij.
