Një 23 vjeçar shqiptar, i kapur duke vjedhur në një apartament, arriti të arratisej në mënyrë spektakolare nga dhomat e paraburgimit në Itali.
Sipas mediave vendase, bëhet fjalë për Elidon Gegaj, i cili është shpallur në kërkim. Raportohet se i riu shqiptar arriti të kalojë në një hapësirë të ngushtë boshe të krijuar mes tavanit dhe hekurave të portës që nuk mbërrinin deri lart.
Duke përfituar nga mungesa e vëmendjes së rojeve, i riu ka dalë në korridor dhe është larguar pa u vënë re nga askush.
Gegaj akuzohet për vjedhje, e madje në momentin e prangosjes i ishin gjetur dhe sendet e grabitura në një banesë, pronarët e të cilës ishin me pushime. Ai ra në prangat e policisë, teksa ishte bllokuar në ballkonin e një apartamenti në Monza, të cilin e kishte plaçkitur.
