Ka dështuar samiti i mbajtur në Vietnam, teksa Trump dhe Kim Jong-un nuk kanë arritur në një marrëveshje. Sipas presidentit amerikan, samiti dështoi pasi Koreja e Veriut kërkoi që të hiqeshin të gjitha sanksionet ndaj saj.
Trump mbajti një konferencë shtypi pas samitit me udhëheqësin e Koresë së Veriut, ku ka dhënë detaje lidhur me takimin mes tyre.
“Mund të kisha firmosur sot, por doja të veproja drejt dhe jo shpejt”, tha Trump.
Shtëpia e Bardhë pohoi se nuk ka pasur një marrëveshje mes Trump dhe Kim Jong-un, ndërsa shtoi se ata kishin diskutime konstruktive mbi çështjen e denuklearizimit.
“Presidenti Donald J. Trump i Shteteve të Bashkuara dhe Kryetari Kim Jong-un i Komisionit të Çështjeve të Shtetit të Republikës Popullore Demokratike të Koresë mbajtën takime shumë të mira dhe konstruktive në Hanoi, Vietnam, më 27-28 shkurt 2019. Të dy udhëheqësit diskutuan mënyra të ndryshme për të çuar përpara denuklearizimin dhe konceptet e nxitura nga ekonomia. Asnjë marrëveshje nuk është arritur në këtë kohë, por ekipet e tyre përkatëse shpresojnë të takohen në të ardhmen”, pohoi Shtëpia e Bardhë.
Më parë Kim dhe Trump dukeshin më të sigurt në përparimin në bisedimet e tyre. Kim tha se do të ishte i gatshëm për çështjen e denuklearizimit, duke folur në ditën e dytë të samitit me Presidentin e SHBA Donald Trump në Hanoi, Vietnam.
“Nëse unë nuk jam i gatshëm ta bëj këtë, unë nuk do të isha këtu tani”, u tha Kim gazetarëve përmes një përkthyesi kur u pyet nëse ai ishte i gatshëm të heqë dorë nga armët e tij bërthamore.
Megjithatë, udhëheqësi i Koresë së Veriut nuk dha hollësi mbi atë që nënkupton denuklearizimi ose hapat konkrete që ai do të merrte.
Ndërsa SHBA kërkon që Koreja e Veriut të heqë dorë nga të gjitha armët e saj bërthamore, Koreja e Veriut dëshiron heqjen e një ombrelle bërthamore të SHBA-së për aleatët e saj aziatikë, si Koreja e Jugut dhe Japonia./ Përshtati Tirana Today
