Gjykata e Posaçme e Apelit ka shtyrë për në 29 korrik seancën ndaj ish-kryeprokurorit, Adriatik Llalla. Shkak është bërë mungesa e avokatit Sokol Hazizaj dhe kërkesa e Llallës për mosvijimin e gjyqit pa mbrojtës, ndaj seanca e radhës është caktuar për në 29 korrik. Për shkak të mungesës së pajustifikuar, gjykata gjobiti me 20 mijë lekë avokatin e ish-kryeprokurorit. Vetë Llalla ka qenë i pranishëm në seancën e sotme, ku prokuroria kërkoi zëvendësimin e avokatit të tij mbrojtës, me një avokat të zgjedhur kryesisht.
Ish-kryeprokurori i Përgjithshëm, Adriatik Llalla, ka ankimuar dënimin me 2 vite burg në Shkallë të Parë, për akuzën e fshehjes së pasurisë në 3 raste. Gjykata urdhëroi kërkesën për konfiskim të gati 22 mijë metrave katrorë truall dhe një apartament në Durrës dhe aprovoi si dënim shtesë edhe mohimin për të marrë funksione publike për pesë vite.
