Gjykata e Shkodrës vendosi sot 30 ditë burg për katër shtetas të prangosur, pasi akuzohen vetëm për fishekët, e jo për armët. Masa e sigurisë u dha për katër personat e ndaluar pak ditë më parë, gjatë një aksioni të madh policor në dy lagje të qytetit.
Ky vendim bie ndesh me euforinë e policisë, ku bënin me dije se aksioni në fjalë ishte ndërmarrë në kuadër të operacionit “Forca e Ligjit”, dhe se të ndaluarit për një kohë të gjatë janë mbajtur në përgjim dhe vëzhgim. Tashmë këta persona me rrezikshmëri të lartë, anëtarë të grupeve kriminale, do të qëndrojnë për një kohë të shkurtër në burg, e një prej tyre u lirua.
Të mërkurën, policia nisi një aksion të gjerë në Shkodër, për zbulimin e grupeve kriminale që dyshohet se kanë gisht në ngjarjet e rënda të muajve të fundit në këtë qytet.
Bazuar në 19 urdhra kontrolli të miratuar me vendim gjykate, Policia e Shtetit ushtroi kontrolle në 20 banesa e lokale tregtare të përdorura prej personave të dyshuar si anëtarët e grupeve kriminale.
Operacioni nisi të mërkurën rreth orës 02:30 të mëngjesit. Po kështu u sekuestruan armë, municione, mjete të blinduara, dhe sende të tjera të poseduara në mënyrë të paligjshme.
https://tiranatoday.com/arrestimet-e-bujshme-ne-shkoder-tre-nga-kater-te-arrestuarit-ne-qeli-per-30-dite/
