Kryeministri i Kosovës, Avdullah Hoti, ka anuluar takimin për të qenë prezent në 27 qershor në Shtëpinë e Bardhë. Hoti e ka përcjellë vetë lajmin në rrjetet sociale, ku ka theksuar se duhet të kthehet në Prishtinë, pas zhvillimeve të djeshme. Ai shprehet se për këtë vendim ka njoftuar edhe ambasadorin Richard Grennell.
Statusi
Për shkak të zhvillimeve të reja në Prishtinë si rezultat i akuzave të dorëzuara nga Zyra e Prokurorit të Specializuar, më duhet të kthehem në Prishtinë për tu marrë me situatën. E kam njoftuar Ambasadorin Grenell se nuk mund të marrë pjesë në takimin e datës 27 qershor në Shtëpinë e Bardhë.
Më herët, me anë të rrjeteve sociale, i dërguari i Shtëpisë së Bardhë për dialogun mes Kosovës dhe Serbisë, Richard Grenell, shprehej se takimi i 27 qershorit mes përfaqësuesve të Prishtinës dhe Beogradit në Uashington, është mundësi për zhvillim të ri dhe investime ekonomike.
Dialogu Kosovë-Serbi, i ndërmjetësuar nga Bashkimi Evropian, ka nisur më 2011 në Bruksel. Ai është pezulluar nga nëntori i vitit 2018, kur autoritetet e Kosovës patën vendosur taksë 100 për qind në mallrat e Serbisë dhe Bosnjë-Hercegovinës.
Kjo masë është zëvendësuar me reciprocitet, por qeveria e re e kryeministrit të Kosovës, Avdullah Hoti, ka hequr të gjitha masat, për shkak siç është shprehur ai, heqjes së të gjitha pengesave për vazhdimin e dialogut me Serbinë.
