Dje, profesor Mark Marku hoqi dorë nga mandati i deputetit pas zgjedhjes në qarkun e Lezhës dhe shkëputjen nga Partia Demokratike. Në një shkrim të publikuar në media, Marku ka listuar arsyet e largimit, ku shpreh trishtimin e thellë për gjendjen ku ndodhet PD-ja pas humbjes.
Ai e nis me fushatën e dobët të partisë, manipulimin nga kundërshtari dhe rënien në rutinën humbëse duke mos kontestuar rezultatin, fushatën farsë për zgjedhjen e Lulzim Bashës në krye të PD.
Z. Marku i mëshon fort faktit se PD-ja është kthyer në një parti mburojë të interesave të dy liderëve, që sipas tij, janë ish-kryeministri Sali Berisha dhe kryedemokrati Lulzim Basha. Kujtojmë këtu se para zgjedhjeve të 25 prillit, por edhe pas tyre, profesor Marku ka bërë thirrje për mosnjohjen e zgjedhjeve të 25 prillit, dhe nisjen e protestave anti-qeveritare. “Format e reagimit të PD-së duhet të jenë protestat masive, të gjithë format. Mos njohja e zgjedhjeve nuk nënkupton mos pjesëmarrje në Parlament.
Në gjykimin tim, duhet të jetë një luftë totale për largimin e bandave dhe Ramës. Duhen kombinuar të gjitha format e rezistencës. Reagimi do të jetë në të gjitha format, nuk do të njihen zgjedhjet nga Partia Demokratike”, deklaroi Marku në 4 maj të këtij viti nga oborri i selisë blu, pas një mbledhje me kryedemokratin Lulzim Basha.
Siç duket, këto thirrje kanë rënë në “vesh të shurdhët”, pasi Basha nuk ka mbështetur protestat dhe revoltat, duke detyruar Mark Markun të mbajë qëndrim radikal.
