Gjykata e Krimeve të Rënda pritet të japë vendimin për ish-ministrin e Brendshëm Saimir Tahiri pas orës 16:00.
Në mbrojtjen e bërë para trupit gjykues, Tahiri nuk ka lënë pa shënjestruar pasardhësin e tij në Ministrinë e Brendshme, Fatmir Xhafën, edhe pse nuk ia përmendi emrin. Brenda në sallën e gjyqit, ish-ministri mësohet se ka deklaruar: Jam i pandehur vetëm sepse i kam shitur makinën vellait te dy trafikantëve, i cili nuk ka qene i dënuar. Sipas tij, disa të tjerë që i kanë vëllezërit trafikantë, nuk mbajnë asnjë përgjegjësi.
“Ndodhem këtu si i pandehur se i shita makinën një personi, ndërkohë që njoh plot njerëz e ka plot të tillë që s’mbajnë përgjegjësi edhe për vëllezër trafikantë. Ju po më mbani këtu për interesa që vetëm ju mund të mi shpjegoni”, është shprehur Tahiri në sallën e gjyqit, sipas gazetares Klodiana Lala.
“Punova si ministër edhe kur me vunë bombat ne shtëpi. Rama eshte shefi im i madh ne politike, as unë e as Rama nuk jemi shefa ne raport me krimin”, mësohet të ketë thënë ish-ministri.
Kujtojmë se në seancën e datës 10 shtator, Prokuroria për Krime të Rënda kërkoi shpalljen fajtor dhe dënimin me 12 vite burg për ish-ministrin e Brendshëm. Duke përfituar nga gjykimi i shkurtuar, prokurori kërkoi për Tahirin dhe ish-drejtorin e Policisë së Vlorës, Jaeld Çelën, dënimin me nga 8 vite burg përfundimisht.
