Policia shoqëroi dy nxënës të shkollës “Janaq Kilica” në Fier, me akuzën se ishin ata që hodhën lëndën helmuese. Një ditë më parë, 60 nxënës të gjimnazit “Janaq Kilica” përfunduan me shenja helmimi në spital. “Abcnews.al” ka siguruar dëshminë e njërit prej tyre, duke zbardhur gjithçka ka ndodhur në lidhje me helmimin e konsideruar si të mistershëm në këtë shkollë.
Në dëshminë e tij, njëri nga nxënësit është shprehur se kanë përdorur një spraj për t’u mbrojtur nga kafshët e egra në mal. Spraji përdoret nga alpinistët dhe gjahtarët, me qëllim mbrojtjen në rast se sulmohen nga kafshët e egra, kryesisht arinjtë.
I riu ka deklaruar se sprajin e kishte blerë në njërin prej dyqaneve të shitjes së armëve të gjahut në zonë, dhe e kanë përdorur dy herë, duke shkaktuar probleme të mëdha tek nxënësit e tjerë.
Intoksikimi i nxënësve dhe 2 mësuesve të gjimnazit “Janaq Kilica” në Fier, erdhi si pasojë e hedhjes së një sprajti në ambientet e brendshme të shkollës.
Në këtë përfundim doli policia, që tashmë ka nisur procedimin penal per dy nxënës 15-vjeçarë të shkollës. Të miturit akuzohen për “ndotje të ajrit” dhe “prishje të qetësisë publike”.
Nxënësit kanë dalë nga spitali, dhe tashmë janë në gjendje shumë të mirë shëndetësore.
Mësimi rinisi normalisht edhe sot, por situata në shkollë është ende e tensionuar.
