Ministrja e Arsimit, Besa Shahini deklaron se ka folur me rektorët e universiteteve sa i takon planit që ata kanë për të mbyllur këtë vit akademik.
Përmes një video-mesazhi në Facebook, Shahini bën me dije se të gjithë kanë filluar nga puna për të zbatuar planet. Ajo theksoi se viti akademik duhet të mbyllet domosdoshmërisht brenda këtyre muajve.
Ministrja tha se universitetet do t’i dorëzojnë planet brenda datës 15 maj. Më pas, ato do të verifikohen nga Ministria e Shëndetësisë nëse plotësojnë kushtet dhe kriteret për ruajtjen e shëndetit të studentëve dhe pedagogëve.
“Urdhri për marrjen e masave për mbylljen e vitit të ri akademik 2019 – 2020 kërkon nga universitetet që të fillojnë një planifikim urgjent për mbylljen e vitit akademik me kushtet e jashtëzakonshme që po punojmë pas përhapjes së koronavirusit në Shqipëri. Situata po shkon drejt përmirësimit, por nuk jemi ende plotësisht jashtë rrezikut, prandaj çdo lloj hapje e pjesshme e universiteteve duhet gjithsesi të përcillet në mënyrë strikte që të ruajmë shëndetin e studentëve dhe pedagogëve. Ndaj kemi kërkuar nga universitetet që të shikojnë se cilat janë ata lëndë që të jepen vetëm online.
Pra nuk do ketë nevojë që studentët të shkojnë në mësime, të shihet sa është numri i studentëve që kanë nevojë për laboratore etj para provimeve dhe sa është numri i saktë i studentëve që do bëjnë provime në korrik e në fillim të gushtit të këtij viti. Gjithmonë për provimet prioritetet janë ata studentë që diplomohen. Universitetet deri më 15 maj do sjellin planet, pastaj ne në bashkëpunim edhe me MSH bëjmë edhe verifikimet e fundit, për të parë nëse po plotësohen kushtet dhe kriteret për ruajtjen e shëndetit të studentëve dhe pedagogëve që duhet të punojnë gjatë kësaj kohe në ambiente universitare. Kam folur me rektorët që kanë nisur nga puna për planet që ata kanë. Opozita sjell si gjithmonë kaos, pasi nuk ka gjë të paqartë”, thotë minstrja.
Pse rrogat rriten në letra, por varfëria rritet në realitet?
