Kryeministri Edi Rama bashkë me ministren e Shëndetësisë, Ogerta Manastirliu kanë vizituar një depo farmaceutike ilaçesh.
Kreu i qeverisë ka shpërndarë në Facebook një video nga vizita në depo, për të cilën thotë se ambientet janë te standardeve evropiane.
Sipas tij, nëse deri dje ilaçet shiteshin nëpër farmaci pranë QSUT sa frëngu pulën, sot barnat janë në një depo të standardeve më të mira.
“Deri dje pa asnjë sistem e garanci për barnat, që mungonin në spital dhe shiteshin sa “frëngu pulën” farmacive të mbira si kërpudhat rrotull QSUT, ndërsa sot me një depo moderne barnash të standardeve evropiane, që garanton sistemin e furnizimit, sigurinë e medikamenteve, transparencën e konsumit të tyre për pacientët e QSUT”, shkruan ai në postimin e tij.
Nga ana tjetër, Manastirliu theksoi se është rritur edhe buxheti për barnat.
“Është rritur buxheti për barnat. Janë 40 milionë euro që janë në dispozicion për barnat. Kemi rritur 3 herë numrin e barnave dhe buxhetin e kemi shtuar. Ky është një investim shumë i mirë. Brenda strukturës janë edhe zyrat e personelit infermieror. Kemi vetëm një derë dhe kështu edhe kontrolli rritet më shumë. Këtu kemi magazinën e barnave ku furnizimet janë kryer dhe ndarja është sipas kategorive. Ashensorët janë funksionalë për peshat e mëdha. Shqiptarët më herët ishin detyruar që të blenë barna në farmaci sikur të ishin furra. Kemi bërë strukturë evropiane. Gjithçka është sipas kushteve më të mira”, tha ajo.
