Deputetja e Shkodrës, Izmira Ulqinaku nuk e nisi fjalën e saj të parë në parlament me përshëndetjen e kreut të Kuvendit.
Teksa u prezantua si mbesa e një prej dëshmorëve të protestës së 2 prillit në vitin 1991 në Shkodër, ajo e quajti Gramoz Ruçin njollën më të zezë të parlamentit pluralist shqiptar.
“Etika ma do që fjalën ta filloj siç do ishte më normalja, duke përshëndetur edhe kryetarin e Kuvendit por historia e familjes time nuk ma lejon. Jam mbesa e një prej dëshmorëve të 2 Prillit të vitit 1991. Nuk e kisha menduar se do të flisja ndonjëherë në parlamentin shqiptar, pas 27 viteve pluralizëm dhe kryetar i saj të ishte Gramoz Ruçi, protagonisti i ngjarjes. Vendosja e ish ministrit të Brendshëm të diktaturës komuniste përbën një prej njollave më të zeza të parlamentit pluralist shqiptar”, tha Ulqinaku.
I menjëhershëm ishte edhe reagimi i Ruçit, i cili u përgjigj me ironi:
“S’ke faj se në 91, ti nuk kishte lindur akoma. Në 92 ishe një vjeçe. Gramoz Ruçi në 92 ka qenë në mes të Piacës në Shkodër, në mes të gjyqit. Dhe nuk është faji jot, që nuk e ndiqje dot marrëdhënien e Ruçit me shkodranët. Se unë shkova me duar në xhepa dhe më kanë përshëndetur të gjithë votuesit e tu”, tha Ruçi.
Deputetja e PD-së kërkoi të replikonte, por Ruçi nuk ia dha fjalën, duke shkaktuar tension në Kuvend. Deputetë të opozitës u ranë tavolinave me dorë, ndërsa Ruçi i dha të drejtën e fjalës Mimi Kodhelit.
Me pas u pa të largohej nga salla lideri i opozitës Lulzim Basha.
