Ligji për Teatrin është kthyer në një “moll” sherri mes palëve politike, e duket se kjo situatë e tensionuar do të vijojë sërish kur të mblidhet Kuvendi. Deputeti socialist Pjerin Ndreu, i ftuar në studion e “Fax News”, i është përgjigjur me të njëjtën monedhë paralajmërimeve të kreut demokrat Basha, teksa nënvizoi se shumica është mazhoranca, dhe ajo i merr vendimet.
“S’merrem me vijat e kuqe të Lulzim Bashës, lideri i opozitës është në minorancë, për sa kohë njerëzit kanë votuar PS-në, vendimet i marrim ne. Ne jemi mazhorancë dhe kemi për detyrë që këtë vend ta zhvillojmë me konceptin dhe vizionin tonë, i cili ka treguar se është në diferencë me të tjerët.
PS është të implimentojë strategjinë e zhvillimit të vetë, nëse nuk është e mirë do të gjykohet nga populli, keto rëniet e gjoksit se unë bëj..kush do ta bëjë skenarin ogurzi, për çfarë, kush do ta bëjë, po bëhet një Teatër modern, tani do bësh Teatër apo do ruash godinën, unë e kam parë ajo nuk ka asnjë lloj konstrukti të godinave të Ministrive, do krijojmë të gjitha kushtet e nevojshme që kushtet të jenë bashkëkohore në Teatrin e ri”, deklaroi Pjerin Ndreu.
Ndreu paralajmëroi tërmet në politikën shqiptare, pasi reforma do të implementohet dhe të prekurit do të jenë edhe nga ana e mazhorancës.
“Ka një moment themelor sot në zhvillimet shoqërore shqiptare, është Reforma në Drejtësi, për ata që e dinë, e dinë se kjo Reformë në Drejtësi do të shkëpusë shtetin nga korrupsioni, është një reformë nga më të ashprat, por që duhet bërë.
Këtë reformë ka segmente që po e pengojnë dhe dora e bashkëpunimit e Edi Ramës ka shkuar deri atje sa për këtë reformë u ka dhënë edhe letrën bosh, ne jemi të vendosur që ky vend të zhvillohet, ka vetëm një klauzolë implementimi i Reformës në Drejtësi dhe ngritja e strukturave antikorrupsion që janë Byroja Kombëtare e Hetimit, Prokuroria e Posaçme dhe Gjykata e Posaçme. Do të implimentohet edhe me këto pengesa, ne nuk lusim opozitën, opozita është e pozicionuar hapur për pengimin e saj”, tha Ndreu.
Deputeti i PS tha se do e çojnë misionin deri në fund, ndonëse dhe ata do të paguajnë kostot e tyre. Ai tha ndër të tjera se do të ketë shumë të penalizuar brenda mazhorancës. Duke e cilësuar reformën si një tërmet, Ndreu deklaroi se secili duhet të paguajë faturën e tij.
“Ne do ta çojmë deri në fund, edhe duke e ditë se do paguajmë kostot tona. Do kete shumë të penalizuar brenda mazhorancës, do paguajmë edhe ne faturën. Ajo reforma është një tërmet, se kë do zërë nuk e di dhe për shkak të atij tërmeti dikush është në panik. Nëse ka një moment ku ne ndahemi nga shteti i korruptuar, ky është rasti, çdo lloj interpretimi tjetër është për të ruajtur atë strukturë që kishim deri dje. Shumë shpejt do të implimentohet reforma”, shtoi ai.
