Përkundër qëndrimit zyrtar shprehur me anë të një statusi në rrjetet sociale, deputeti Gjetan Gjetani thotë se ai nuk ka ndërmend që të largohet nga Kuvendi. Po kështu ai i mëshon fort faktit se për asnjë arsye, nuk do të bëhet servil i askujt.
“Unë do shkoj në parlament, dhe do shkoj në grupin parlamentar të PS, por nuk e kam ndërmend dhe po e them publikisht të bëhem servil i asnjërit”.
Përmes një interviste të dhënë për “Ora News”, ai ka deklaruar se nuk është aspak i surprizuar me vendimin e Ramës.
“Nuk kam pasur një komunikim zyrtar nga ana e PS për përjashtimin tim. Me kryeministrin Rama nuk kam kërkuar takim, pasi në asnjë rast nuk më ka pritur përpara, dhe fakti që nuk më ka pritur përpara, nuk besoj që më pret tani pas”.
Më tej Gjetani thekson se në vitin 2013 ka rrezikuar edhe jetën për PS. “Në zgjedhjet parlamentare të 2013, mua dhe shumë socialistëve në Kurbin na është rrezikuar jeta”.
Pavarësisht situatës, ai shprehet se nuk do të lëvizë në grupe të tjera parlamentare. Ai shton se pavarësisht masës së deklaruar prej kryeministrit Rama, do të votojë dhe do të qëndrojë me PS.
Deputeti Gjetan Gjetani për të cilin Rama kërkoi përjashtimin nga grupi parlamentar, më herët ka reaguar, duke e konsideruar vendimin e padrejtë. Në një status në Facebook, Gjetani shprehet se socialist nuk e ka bërë Rama, dhe si i tillë as nuk mund ta largojë.
