Deputeti i Partisë Demokratike, Dashnor Sula, ka “tronditur” me deklaratën e tij të fundit teksa zbuloi paktin e fshehtë që u bë në 2013 mes Ilir Metës dhe Sali Berishës. Në një intervistë në “Vizion Plus” ai tha se në vitin 2013 të gjithë e kuptuan që Berisha dhe Rama kishin një pakt që përfshiu edhe kreun e LSI-së në atë kohë Ilir Meta, i cili la qeverinë për t’u bashkuar me Partinë Socialiste. Në vazhdën e akuzave, ai vijoi më tej duke thënë se politikanët që kanë drejtuar vendin këto 30 vite, kanë përgjegjësi për gjendjen ku është sot Shqipëria.
“A kam unë rezerva për Sali Berishën? Pa diskutim shumë. Kam qasje të ndryshme për mënyrën se si është drejtuar PD-ja, apo si u bënë tani lëvizjet e Foltores. Nuk jam dakord me tezat e tyre, por jam opozitar dhe duhet të jemi të gjithë në protesta.
Kam rezerva edhe për Ilir Metën jashtëzakonisht shumë. Këta që kanë zotëruar politikën shqiptare këto vite kanë përgjegjësitë e tyre. Është faji i Ilir Metës dhe i doktor Berishës për marrëveshjen e 1 prillit. Ishim në Parlament të gjithë në fund të marsit, të gjithë ishin të qeshur kur papritur iku Ilir Meta në 1 prill. Si iku Ilir Meta? Budalla unë nuk jam, mund të gënjesh një fshatarin tim por jo mua. Unë e di si lëvizin gjërat. Dhe çfarë ndodhi? Pas 2013 më gjej një dosje të një ish-ministri apo ish-drejtori tonin që u akuzua për korrupsion para 2013-tes që të shkonte para drejtësisë për korrupsion? Si nuk shkuan para drejtësisë? Ndodhi sepse ka marrëveshje”, tha Sula.
(Deklaratën e deputetit demokrat e gjeni në minutën e 24)
