Deputeti i AAK-së, Daut Haradinaj në emisionin ‘A show’ është shprehur se ministri i jashtëm në detyrë Gent Cakaj duhet të tregohet i kujdesshëm kur flet për ndryshimin e kufijve mes Kosovës dhe Serbisë.
Haradinaj tha se e njeh Cakajn si djalë ambicioz dhe të përgatitur, por duhet t’i vendosë ‘fre gojës’ kur flet për territoret e Kosovës, pasi sipas tij kufijtë janë vendosur me gjak.
“Është djalë i ri, ambicioz dhe i përgatitur. Duhet t’i vendosë fre gojës sepse nuk ka mandat ai të flasë për territore të Kosovës. Mua më kanë thënë që nuk e ka deklaruar me vetëdije për shkëmbimin e territoreve. Këto kufij janë vendosur me gjak dhe kushdo që do i prekë do e pësojë njësoj”, u shpreh Haradinaj.
Daut Haradinaj, gjithashtu theksoi se Kosova pret më shumë nga kryeministri Rama, pasi nga Aleksandar Vuçiç, president i Serbisë, presin vetëm të këqija.
