Deputeti i Bundestagut gjerman, Jens Kestner ka deklaruar se në Qeverinë e Republikës së Kosovës, aktualisht janë të ulur shumë kriminelë.
Jens Kestner që vjen nga partia e ekstremit të djathë AFD ( Alternative Fur Deutschland), në një intervistë për Tv Pink është shprehur se këta persona nuk mund të arrestohen sepse mbrohen nga dikush.
“Na kanë thënë se nuk është e mundur të arrestohen këta njerëz, edhe pse ata e dinë se kanë kryer krime, por janë të mbrojtur dhe është e pamundur që t’i gjykojë dikush ata, sepse dikush i mbron”, shprehet Kestner për Tv Pink.
Më tej ai shton se në ditët e sotme në pushtet ka shumë kriminelë.
“Tani në pushtet në Prishtinë ka shumë kriminelë”, thekson deputeti.
Sipas Gazetës Express, në këtë intervistë ai është pyetur edhe për “Shtëpinë e Verdhë” dhe pretendimet për trafikim të organeve, duke iu bërë thirrje organeve të BE-së dhe Prokurorëve që të zgjidhin një problem të tillë.
Ditë më parë një deputet nga e njëjta parti, kishte thënë se Kosova duhet të kthehet nën administrimin e Këshillit të Sigurimit të OKB’së.
Deputeti pro-serb i Bundestagut gjerman, Hansjörg Müller, nga partia Alternativa për Gjermaninë (AFD), kishte deklaruar se pranimi i pavarësisë së Kosovës ishte një neglizhim i ligjit ndërkombëtar.
Müller thotë se Kosova duhet kthyer përsëri nën administrimin e Këshillit të Sigurimit.
“Le t’i kthehemi drejtësisë, ta kthejmë Kosovën nën administrimin e Këshillit të Sigurimit”, kishte thënë ai në një intervistë për ‘Novosti’.
