Sot deputetët do ‘thyejnë’ karantinën. Pritet që në orën 10:00 të nisë seanca plenare, e cila do të zgjasë 2 orë, ku do të diskutohen 24 nisma ligjore. Gjatë seancës së sotme do miratohen disa ndyshime në Kodin Penal, me qëllim që të ndëshkohen të gjithë ata që shkelin masat e marra për parandalimin e pandemisë. Po kështu, do të ketë diskutime edhe për zgjatjen e afatit të hetimit nga Komisioni Hetimor, për shkarkimin e Presidentit Ilir Meta dhe për dy dekretet e Presidentit, për Anti-KÇK dhe ligjin e pronave.
Sikundër u njoftua edhe më herët, për deputetët janë marrë masat mbrojtëse lidhur me pandeminë. Të gjithë do të jenë të pajisur me maska, doreza e dezinfektantë. Në hyrje të Sallës së Seancave, do të jetë një grup personeli mjekësor që do të masë temperaturën e deputetëve dhe të administratës, që do të jetë brenda.
Deputetët nuk do të jenë të ulur në vendet e tyre të zakonshme, po do të ruajnë distancën e nevojshme prej 1.5 m, dhe do të shpërndahen në të gjithë sallën, në lozhat anësore të katit të parë dhe katit të dytë, si dhe galerinë e sipërme të sallës.
