Partia Demokratike dorëzoi sot në Prokurori dy kërkesa, ku kërkonte verifikimin e të shkuarës së deputetëve Aqif Rakipi dhe Gjetan Gjetani, pasi pretendonte se ata kanë kryer veprimtari kriminale në Itali.
Pas publikimit të këtyre kërkesave, kanë reaguar deputetët Rakipi dhe Gjetani, të cilët i kanë hedhur poshtë akuzat e bëra nga grupi parlamentar i PD-së.
Në një prononcim për Panorama, deputeti i PDIU-së Aqif Rakipi tha se nuk ka asnjë problem me Italinë, ndërsa kundër akuzoi Bashën dhe grupin e tij për rekorde kriminale në Shqipëri.
“As kam asnjë lloj problemi me Italinë. PD atë punë ka, s’ka me ca të merret edhe meret me mua. Të shofi pjesën e vetë si Lul Basha dhe ato të tjerët atje se i kanë rekordet kriminale këtu në Shqipëri. Unë s’kam asgjë në Itali. E ka shpallur prokuroria për mua kur i kanë marrë verifikimet nga shteti italian dhe ka rezultuar që s’kam asgjë. Të bjeri provat nëse ka dhe pastaj flasim, nëse ka prova okej”, tha Rakipi.
Ndërkohë, deputeti socialist Gjetan Gjetani, e konsideroi kërkesën e PD-së një shpifje të pastër politike, madje tha se hera e vetme që ka dalë jashtë kufirit shqiptar ka qenë këtë vit, kur ka qëndruar 10 orë me familjen në Kotorr.
“Unë tani jam njohur me kërkesën e PD, dhe e konsideroj një shpifje të pastër politike. Unë s’kam dalë kurrë jashtë shtetit, për herë të parë kam kaluar kufirin në prill të këtij viti dhe kam qëndruar për 10 orë në Kotorr me familjen. S’kam qenë as në Itali as në Greqi dhe në asnjë vend tjetër të BE. PD mund ta kontrollojë këtë që them unë me anë të sistemit TIMS. Në kohën që i referohet PD unë kam qenë polic këtu në Shqipëri”, tha deputeti i akuzuar nga PD.
