Kaltrinë Zeneli, aktorja që e publikoi videon ku shihet një grua e moshuar teksa rrihet nga disa punonjëse të qendrës për përkujdesjen e të moshuarve, “Orenda” në Pejë, është kërcënuar. Ajo ka pohuar se ka marrë shumë kërcënime në rrjetet sociale për shpërndarjen e kësaj video nga njerëz të ndryshëm. Në një prononcim për “Telegrafin”, Zeneli tha se përveç kësaj atë po e mërzit fakti se po kërcënohen vajza të tjera të cilat kanë emrin e mbiemrin e njëjtë.
“Është e vërtetë që unë po kërcënohem në rrjetet sociale për videon që e kam shpërnda gjatë natës së mbrëmshme.
Por, realisht unë në rrjetet e mija sociale e kam emrin Kaltrinë Zeneli dhe jo Kaltrina Zeneli dhe personat të cilët kanë kërcënuar, kanë kërcënuar dikë tjetër.
Vajza në fjalë më është drejtuar mua dhe m’i ka dërguar mesazhet që ka marrë prej personave të ndryshëm. Vajza që ka emrin e njëjtë me mua më ka treguar se e ka denoncuar njërin prej komentuesve që i ka dërguar një mesazh kërcënimi”, deklaroi ajo.
Zeneli sqaroi se nuk është ajo e cila i ka xhiruar pamjet. “Njerëzit po mendojnë që vajza e cila e ka xhiruar atë video kam qenë unë, është një keqkuptim këtu. Unë nuk kam xhiruar, nuk jam pjesë e videos.
Jam ajo që e kam shpërnda dhe e kam denoncuar rastin gjë që nuk jam fare e penduar. Unë kam marrë kërcënime edhe nga njerëz që më kërcënojnë me gjuhë të ndryshme si spanjolle, italisht dhe anglisht.
Unë po brengosem për vajzat që e kanë emrin si unë dhe po përballen me këtë rast”, tha ajo.
